Buursebek

't Twentse Volksleed neumt de Regge en 'n Deenkel. Mer veur Hoaksebarge hef benaamd de Buurserbek aait belangriek wes. In de Goalden Eeuw al. De bek wörden too nog broekt as vervoersader veur 't hoalt veur de schepen van de Oost-Indische Compagnie. Later um 't linnen noar de blekeriejen in Haarlem te brengen. De Buurserbek hef zienen oorsproonk evven veurbiej Ahoes en wördt noa Hoaksebarge Schipbeek neumd en keump biej Deamter in 'n Iessel oet. De bek hef 'n verskil in heugte van wal 23 meter.

De Oosterdorper watermöl steet an de Buursebek en dat is de stie woar he al seend 1548 steet. 't Is de oaldste dubbele watermöl dee 't in ons laand gef met an de ene kaant ne korenmöl en an de aandere kaant ne ölliemöl veur 't sloan van lienöllie. Vriejwilligers hoaldt dizze möl, dee in 1988 helemoal restaureerd is, in 'n gaank. Umdat de möl zo mooi lig komt der onmeunig völ leu op of. Iej könt de möl bekieken van april töt september op goonsdag en zoaterdag van twee töt vief uur nommedagens.